پ
پ

«رأس مطهر امام»

گتوردی عشق شهادت نه لر حسین باشینا؟
که ایندیده بشریت دؤنر حسین باشینا

حسینون عکسینی چکماخ چتندی ای نقاش
مجازی چهره نی کیم بنزَدَر حسین باشینا؟

بو عکسیلر که اولوب منتشر، ندور سَنَدی؟
قلم سینار اونی اوخشاتسا گر حسین باشینا

دیولله راهب او عکسی چکوب فرانسه ده دی
مگر فرانسه لی قیمت بیلر حسین باشینا؟

او عکسی چکمدی راهب که موزیه قویالار
گدوب گلوب باخا هر رهگذر حسین باشینا

حسینون عکسینی الله چکوب اورکلرده
اورک باشندا هامی یر ویرر حسین باشینا

او باش نجولدی هارا گیتدی کنج کاو اولما
دیمه اولوب هارا آخر مقر حسین باشینا

امامی ناقص الاعضا مزاره قویمازلار
همیشه ظلّ الهی دوشر حسین باشینا

گرکدی شیعه اولا پای بند عقیده سینه
ملک محافظیدی ای بشر حسین باشینا

هامی بلور که امامی امام قبره قویار
حدیث لر یازوب اهل خبر حسین باشینا

خدا ولایت مطلق ویروبدی معصومه
داخی جداده نه جای خطر حسین باشینا

بلی او باش او یارالی بدنله دفن اولدی
بنی اسد دولانوب سر بسر حسین باشینا

او جلوه معجزیدی گورسنوب سنان اوسته
که تا باش اندیره شمس و قمر حسین باشینا

استاد کلامی زنجانی
«این شعر مقدمه و مأخره دارد…»
ــــــــــــــــــــــــــــــــــــــــــــــــــ
مأخذ: مباهات کلامی
تاریخ انتشار: ۱۳۷۶

ثبت دیدگاه

دیدگاهها بسته است.