ياحسين بوجمعيدن يکسر سلام اولسون سنه
بيزدن اي فرزند پيغمبر سلام اولسون سنه
اي مناي عشقده تپراقلار اوسته جان وئرن
جانيني الله يولوندا تشنه لب قربان وئرن
نازنين باشين تنور خوليه مهمان وئرن
اي قالان گل پيکري بي سر سلام اولسون سنه
اي اسن باد خزان اول گلشن و گلزارينه
اي يولي باغلي قالان قان آغليان زوّارينه
اي بيزي حسرت قويان اوز قبرينون ديدارينه
ايلين آماج مين غملر سلام اولسون سنه
اي باشي سر نيزه ده قرآن تلاوت ايلين
کوفه ننون اهلين ره حقّه هدايت ايلين
امتحان بزمينده هر آن اسقامت ايلين
بُرج اسلاميته اختر سلام اولسون سنه
ياحسين بيز اولموشوق روح روانون عاشقي
يوسف کرب وبلا اکبر جوانون عاشقي
اولدي قان اولموش اورک اول مه لقانون عاشقي
اي شهيد نيزه وخنجر سلام اولسون سنه
ياحسين بيزده عزيز مجتبي مشتاقيوق
باشيله جاندان گئچن بير باوفا مشتاقيوق
طوي حناسي قان اولان نو کدخدا مشتاقيوق
اي عزيز خالق داور سلام اولسون سنه
قلبيميزده ياحسين تخم محبّت اکميشوق
اصغرون باب والحوائجدور اونا گوز تيکميشوق
طوطي شيرين زباندان ئو تري چوخ غم چکميشوق
اي عزيز ساقي کوثر سلام اولسون سنه
بيزلري مهمان ائله مير غضنفر قبرينه
يعني عبّاس علي شير دلاور قبرينه
گر يتيشساق ياحسين فرزند حيدر قبرينه
عرض قيلوق اي مه انور سلام اولسون سنه
گوردون عاشورا گوني طغيان ائدور قوم کَفَر
آز قالوب دين مبينه يتسون اعدادن خطر
تيغ تيز اشقيايه سينوي ائتدون سپر
حامي قرآن ، هنر گستر سلام اولسون سنه
سن اميرالمؤمنين باهنر فرزنديسن
دختر خيرالورانين بير گوزل دلبنديسن
جان و دلدن دين حقّين دائماً پابنديسن
اي صدفدن آيريلان گوهر سلام اولسون سنه
يا حسين سنسن عزيز حضرت خيرالنّسا
وار سنه الله يانوندا بير مقام کبريا
چاره سيز درد و بلاي خلقه ايلرسن دوا
نور چشم فاتح خيبر سلام اولسون سنه
“دلکش” غم ديده ايلر قبر پاکون آرزو
کربلا آدين دمادم ديلده ايلر گفتگو
قسمت ائت شطّين سويوندا شوقيله آلسون وضو
سويلسون اي خسرو خاور سلام اولسون سنه
شعر از:
مرحوم احمد رمضاني (دلکش زنجاني)
ثبت دیدگاه